Kapen tre korçarët që siguronin drutë në paligjshmëri, aktiviteti në pyjet e Vithkuqit

Tre banorë të Vithkuqit kanë zgjedhur rrugën më të keqe për të siguruar drutë për dimrin, prerjen e pyjeve në mënyrë të paligjshme.Policia e Korçës ka nisur procedimin penal në gjendje të lirë për tre persona R.N., 38 vjeç, O.B, 37 vjeç dhe K.Q, 37 vjeç.

Procedimi ndaj tyre filloi pasi, këta persona dyshohet të jenë autorë të ngjarjes së ndodhur më datë 4 tetor ku nga kontrollet e ushtruara nga ana e shërbimeve policore në vendin e quajtur “Qafa e Martës”, Njësia Adiministrative Vithkuq, u gjetën dhe sekuestruan në cilësinë e provës materiale 10 m kub lëndë drusore, si dhe 3 (tre) mjete pa targa që shërbenin për transportimin e lëndës drusore, të cilat shtetasit e lartpërmendur i kishin fshehur në një zonë të pyllëzuar.

Materialet në ngarkim të tyre i kaluan Prokurorisë të Rrethit Gjyqësor Korçë, për veprën penale: “Prerja e paligjshme e pyjeve”.