PETRO NINI ËSHTË I TË GJITHËVE

DUAJE MIRË FËMIJËN TËND,

TREGOJI RRUGËN E DREJTË,

MËSOJE SE HUMBJA ËSHTË PJESË E JETËS,

SE DURIMI TË RRIT DHE FORCON

DHE SE NESËR  DO FITOSH NJË BETEJË MË TË MADHE.

Sot mësova një të re tjetër në profesionin tim. Pothuaj 20 vite në arsim dhe disa vite në drejtimin e senateve të shkollave ku kam punuar, të japin mundësinë të njohësh shumë modele dhe potenciale. Modeli që trazoi punën time korrekte, është një rast specifik, por që gjykoj se duhet njohur me kujdes, pasi gabimisht mund të shihet në prizme të ndryshme. Konkretisht zonja Manjola Arizaj është nëna e nxënëses Edma Arizaj, e cila kandidoi për pozicionin e kryetares së Senatit të shkollës.

 Pasi vajza nuk votohet nga komisioni i zgjedhjeve, prindi reagon më shumë se negativisht. Artikulli i saj në të cilin citohet emri im, dhe i shkollës në fakt nuk më godet mua, godet vetë autoren. Ambicia pozitive nuk është sjellje arrogante, as keqpërdorje e informacioneve, as mburrje me punën e prindërve para atyre senatorëve të tjerë që nuk e kanë këtë privilegj, as kërcënim, as përplasje publike, as njoftim i miqve të bëjnë skena në oborrin e shkollës, as presione në artikuj publicistikë ndaj mësueses, fyerje ndaj stafit dhe institucionit ku ti studion. 

Modeli i nxënësve qytetarë që duam të edukojmë nuk është ky. Këto, me keqardhje ua drejtoj të dyjave, por më shumë nënës intelektuale, që kultivon këtë helm në shpirtin e vajzës së vet. Unë kam bërë detyrën time me korrektësi. Edhe pse e prisja reagimin agresiv të zonjës nënë, vazhdova qetësisht punën time. Për sa të jem në këtë detyrë, të jeni e bindur zonjë se do jem e paanshme. Petro Nini është i të gjithëve, prandaj është i madh, ka vend për të gjithë. Turp të hedhësh baltë mbi shkollën që mësoi fëmijën tuaj dhe vijon ta bëjë. 

Turp të shkelësh mbi pragun e derës që të priti dhe përcolli për vite të tëra. Mësojeni fëmijën tuaj se modestia, mirësjellja, respekti nuk të bëjnë të jesh frikacak, por të nderojnë. Fshijini ato fraza kërcënuese dhune, mllefi, inati, shantazhi, talljeje, urrejtjeje ndaj kujtdo, por mbi të gjitha ndaj mësuesve të fëmijës suaj. Është e lehtë zonjë të sulmosh, kur je në pozita të mira sociale, kur përdor njohjet e tua dhe hakërrehesh ndaj një mësueseje. Por është e shëmtuar. E mbi të gjitha është e dëmshme për vetë fëmijën tuaj.

Tek e fundit, mbi të gjitha: mbi dijet, testet, koncertet, fjalimet është tejet i rëndësishëm edukimi dhe fryma që i përcillni fëmijës tuaj. Ju nuk bëheni dot modeli i asgjëje në këtë mënyrë. Nuk i është bërë asnjë padrejtësi fëmijës suaj, është thjesht një proces në të cilin nuk u votua. Mësojeni të dijë të reagojë në humbje, pasi aty tregon vlerat e vërteta qytetare. Duaje mirë dhe fali qetësinë. Jam e bindur se nëse e mëson këtë, ajo nesër do fitojë në beteja më të mëdha. Studion jashtë apo këtu, personalietin e merr me vete, kudo të jetë.