Librazhd/ Aksident i rëndë, përplaset mikrobusi, 9 të plagosur

LIBRAZHD- Një tjetër aksident ka ndodhur sot në Librazhd. Sipas të dhënave paraprake mësohet se aksidenti ka ndodhur në aksin Librazhd-Elbasan, në vendin e quajtur “Kthesa e Murrashit”, ku një mikrobus me pasagjerë është përplasur me një mjeti tip “Land Rover” duke dalë nga rruga.


Mikrobusi ka tentuar t’i shmanget përplasjes me automjetin tjetër dhe për pasojë ka dalë nga rruga.
Mjeti është përplasur me bordurat mbrojtëse të rrugës dhe fatmirësisht nuk ka rënë në rrjedhën e Shkumbinit që kalon paralel me rrugën kombëtare.


Nëntë persona kanë mbetur të plagosur por jashtë rrezikut për jetën.
“Në aksin rrugor Elbasan- Librazhd, në vendin e quajtur ‘Ura e Murrashit’, mjeti mikro autobus me targa AA 279 UO, me drejtues shtetasin B.D., 54 vjeç, banues në Kuçovë, është përplasur me mjetin tip ‘Land Rover’ me targa DR 3997 F me drejtues shtetasin A.N. 35 vjeç, banues në Durrës.
Si pasojë e aksidentit janë dëmtuar 9 pasagjerë të dy mjeteve të cilët janë dërguar në spitalin e Librazhdit dhe janë jashtë rrezikut për jetën. Grupi hetimor po punon për zbardhjen e shkakut të aksidentit”, njofton policia.